عايز تشتغل في الملابس
ومش عارف تجيب ملابس جمله منين ؟؟
* وفي ناس عايزه تشتغل فالشنط
الحريمى ومش عارفه تجيبها منين؟؟
وناس بتسأل عايزه تفتح
مطعم صغير ومش عارفه تعمل ايه
السلام عليكم ورحمة
الله وبركاتة
احبائي متابعي مدونة :
محمود نافع للمعلوميات
شرحنا اليوم حول العمل
في التجاره علي ارض الواقع وذلك من خلال بعض النقاط التي أنبهك لها وانت من تقوم
بالسعي وراء هذا المشروع الذي يراودك
الموضوع بسيط جدا لاى
حد عارف السوق واشتغل فأى تجاره او حتى بيلف كتير .. فبيكون عارف معظم اماكن
الجمله لمعظم الاصناف ..
 |
| الربح من الملابس والاكسسوارات خلال التجاره في ارض الواقع |
طيب مبدئيا كده انت في
مشروع ما في دماغك بس خايف تاخد الخطوه الاولي او انك عايز تسال الناس قبل ما تتحرك
ف تلجأ مثلا للجروبات او اشحاص في مجالك او قريبين منهم وتبدأ تسالهم علي النت ف
انا هوفر عليك خساره كبيره بسبب اجابه على
سؤالك لحد هو تالت او رابع شخص مثلا ويقولك تعال خاص انا ببيع جمله .. وهو للأسف
بيعتمد انك مش فاهم فالسوق .. فبيشتغلك للأسف وانت بحسن نيه بتصدقه لان الي عايز
ينصب دا بيبقي كلامه حلو .. ومنظم وبيصور لك البحر طحينه وان الشغل اللى هيديه لك
دا طاير وهيتباع هوا .. وهو احتمال كبير للاسف يكون شغل راكد عنده ومش راضي يتباع
اصلا .. الا طبعا من رحم ربي
المهم نيجى بقي لاول بند
وهو فين اماكن البيع جمله:
أ. الملابس:
1 هدخل على موقع دليل المصريه
او موقع يلوبيدچز مصر وهعمل بحث على مصانع الملابس وهكتب عناوين المصانع اللي جنبي
.. لانك ممكن تلاقي مصنع فالشارع اللى وراك وانت متعرفش ..
وعلى فكره ممكن تاخد نص
دسته فقط من مصانع كتير لان الكل عايز يبيع ..
اهم حاجه..
** وانت بتشترى تركز على نقطتين ..
الاولى شفت مثلا تيشرت
ب 30جنيه جمله .. اسأل نفسك لو انا عرضته ب 30جنيه هيتخطف ويبقي لقطه ولا الناس هتستغلاه؟؟
لو حسيت ان سعر جملته لقطه .. اشتريه .. طبعا السبب واضح .. انك متخسرش لو معرفتش تبيعه
بمكسب .
** النقطه التانيه لازم تتفق
مع المصنع او تاجر الجمله على استبدال الديفوهات خلال 3 ايام .
دول اهم نقطتين في شرا
اى بضاعه .. غير كده بيبقي فيها مخاطره حتى لو كنت حاسس انك هتكسب كتير .
ب. أماكن بيع الملابس جمله
غير المصانع ..
* المكاتب اللي فالعمارات
اللى في ميدان العتبه ..
وبالنسبه للبچامات المصرى
والتركى اللى الناس بتعلن عنها كتير معظمها بمول القدس هناك .. اسأل عن الشوازليه هناك
هتلاقي حاجات حلوه جدا.
* الموسكى وما ادراك ما الموسكى
.. عيش هناك هتلاقي كتير من خيرات الله طرح تلاقي .. لانجرى تلاقي مستورد تلاقي مصرى
تلاقي خروج تلاقي بيتى تلاقي كل ما تتوقعه وما لاتتوقعه باذن الله ..
بس خلى بالك لازم تصفي
نيتك وانت نازل انوى انك نازل تجيب حاجه تبسط الناس وترحمهم من المكاسب المغالى فيها
هتلاقي ربك يوفقك لحاجات متخطرش على بالك.
 |
| الربح من الملابس والاكسسوارات خلال التجاره في ارض الواقع |
*
شارع الترعه البولاقيه
بعد ماتطلع من نفق شبرا هتلاقي محلات ومكاتب على اليمين وعلى الشمال المكاتب داخل العمارات
طبعا .. هناك معظم الملابس ايضا وتقريبا نفس اسعار الموسكى الميزه ان المكان مش زحمه
اوى ودى ميزه كبيره لكن طبعا الموسكى اكبر بكتييييير .
* القنطره .. في مستوردين
بينزلوا شغلهم على القنطره وفي مستوردين بينزلوا شغلهم على الموسكى او اى بلد تانى
تبع المستورد نفسه المهم انك لو فبلد جنب القنطره يبقي اقرب لك .
* المحله .. معظم المصانع
لها منافذ توزيع برضو لو انت فبلد جنب المحله تشترى منها .. رحت مصنع وملقتش منفذ توزيع
اسأله على اسم الوكيل .
* اكيد في اماكن كتير تانيه
فالمحافظات لكن طبعا انا بتكلم على الاماكن المشهوره والمعروفه للجميع.
* ملابس التصدير هى عباره
عن ملابس تم تصديرها وبقي منها كميه بسيطه او اترفضت لأى سبب .. وعموما هى اصبحت قليله
جدا الان .. ولكن اعمل بحث عن مصانع التصدير واتواصل معاهم .. او اعمل بحث عن مكاتب
ملابس بواقي التصدير .. المهم .. علشان تعرف دى تصدير ولا لأ ..
بص على التكت وعلى الورق
اللى على القطعه هتلاقي كلهم بأسم واحد وعليهم السعر بالدولار..
خلى بالك لو معندكش خبره
ممكن تشترى بضاعه اترفضت لانها شايطه مثلا او بتبهت او مقاستها غلط .. او مفروزه وكلها
درجه تانيه وتالته .. فيستحسن لو معندكش كبره بالملابس متشتغلش فيها دلوقتى .
* الاستوكات ودى نوعين..
الاول مستعمل ومغسول ومتوضب والتانى جديد لكن موديلات سنه او سنين سابقه او بها ديفوهات ..
طيب نعرف دا من دا ازاى
.. هتبص على التكت لازم تلاقي ورق متعلق على القطعه وعليه نفس اسم التكت والسعر بعمله
البلد الاجنبيه ..
والحاجه التانيه انك تلاقي
الوان ومقاسات القطعه نفسها ..
انما لو لقيت قطعه يتيمه
ومن غير ورق عليها باسم الماركه يبقي تتجنبها افضل ..
ولازم يكون لك خبره فالملابس
علشان تشتغل فيها غير كده بلاش دلوقتى .. والمستوردين هتلاقيهم على جوجل اكتب مستوردين
ملابس باله .. هتلاقي كل عناونهم اعمل لهم زياره وشوف فعلا عنهم استوكات كتير ولا يادوب
بالتين تلاته دا يبقي مش جمله طبعا ..
 |
| الربح من الملابس والاكسسوارات خلال التجاره في ارض الواقع |
عموما انا معنديش فكره
عن شغل الباله ولا عن طريقة استيراده كل اللي اعرفه انه ممنوع يخرج من بورسعيد .. انما
بيتباع ازاى بره بورسعيد معرفش .. وبينى وبينكم انا بحب الشغل المستمر اللى مش عليه
كلام كتير زى اللي وصفته فأول الملابس .. نصيحه خليك فالمضمون طالما معندكش خبره .
1- العبايات .. هتلاقوا اغلب الورش والمصانع في منطقه الوراق .. بجوار سنترال الوراق ..
عايز تفصل او تشترى عبايات جمله انزل هناك الاول شوف مستوى الاسعار والخامات.
2. منتجات 2.5 :طبعا مفيش دلوقتى كتير منها لكن موجوده .. وهنا هقول لكم اماكن الدسته بتبدأ
فيها من 6جنيه لغايه ماشاء الله..
أ. الموسكى برضو .. عييييش
فيه هتلاقي العجب فالدخانيق بتاعته .. اكسسوارات اطفال ادوات مدرسيه لعب مستلزمات مكاتب
ساعات .....الخ كل ماتلف هتشوف حاجات متخطرش على بالك .
ب. درب سعاده ودا امام
الموسكى على طول .
ج. الفجاله .. ودى امام
محطه مصر الشوارع الجانبيه فيها خيرات كتير جدا وكلها حاجات بسيطه وصغيره.
د. النزهه .. مجربتهاش
لكن اسمع عنها .
3.
الشنط الحريمى :
موجود معظم المستوردين
والتجار ومنافذ توزيع المصانع في درب آيه بباب الشعريه .. المكاتب فالعمارات فوق.
4.
الادوات المنزليه :
اغلب المستوردين للمستورد
والموزعين للمصانع المصريه بأبو النمرس بعد المنيب بالجيزه .
5.
معدات المطاعم:
لو معاك اى مبلغ بسيط ممكن
تفتح مكان صغير جدا او تأجر مكان صغير جدا وتنزل باب الشعريه الشارع اللى قبل مديرية
أمن القاهرة هتلاقي فيه خيرات ربنا كتير المصرى والصينى والتركى والايطالي وبيبدأ باسعار
متخطرش على بالك قبل ارتفاع الدولار سألت على الجرل الصينى كان بيبدأ من 500ج وقلايه
الزيت 300ج لغايه ما انت عايز الخلاصه انك ممكن تبدأ صغير وتكبر وتغير الاجهزه للأفضل
كل ماربنا يكرمك.. اسعى انت بس ونيتك كويسه وربك مش هيكسفك ابدا .
6.قماش بنص التمن:
لو عندك ماكينه خياطه او
عايز تعمل شغل بسيط زى الشورتات والباديهات الاطفال والطرح والملايات وقمصان النوم
....الخ ..علي طول تنزل المطريه شارع الترولى هناك هتلاقي القماش بيتباع بالكيلو القماش
دا بواقي مصانع وبواقي تصدير وبيتباع بنص تمنه والسبب .. انك مش بتلاقي كل الالوان
لانها بواقي وطبعا بتتفق مع التاجر ان ترجع له الديفوهات .. بالتأكد بتوفر جامد جدا
جدا لما بتشترى بنص التمن .. وعلى فكره في تجار كتير فالمحافظات اعمل عليهم بحث فجوجل
.. وتوكل على الله وابدأ.
 |
| الربح من الملابس والاكسسوارات خلال التجاره في ارض الواقع |
7.
الخرز ومستلزمات الاكسسوارات الحريمى:
في ناس بتنزل تجيب الخرز
البلاستك وتعمل به اشكال اكسسوارات كتير .. نصيحه .. اشتغلى بالاحجار الكريمه الطبيعيه
وللعلم اسعارها بسيطه مش غاليه ودى ميزتها انها بتتباع بسرعه طبقا لطريقة تسويقك والأحجار
دى موجوده فالازهر فحاره الصالحيه ..
افتكر انى اشتريت لؤلؤ
طبيعي واشتريت الحلق اللى بيبقي
فيه لؤلؤه بلاستك بيضا مدوره وشلتها وحطيط مكانه لؤلؤه طبيعيه تكلفه الحلق كانت 2جنيه
تقريبا .. تخيل بقي حلق لؤلؤ طبيعي تكلفته عليك كده .. بيع بقي ياعم باقل سعر وبيع
كميييات كبيره واكسب كتيييير باذن الله ..
دا مثال طبعا لكن هناك
في العجب الرخيص والغالى وانت هناك هيجياك افكار كتيييير .. توكل على الله وانزل .
8.
طرح المحجبات :
فأول شارع بورسعيد بالموسكى
في محلات جنب بعض كتير عندعم احدث الموديلات .. ادخل بقي الموسكى من جوه ودعبس هتلاقي
محلات كتير وباسعار اقل من المحلات اللى على الشارع لكن موديلات اقل منهم ..
كمان في مصانع وورش كتييير
جدا ممكن تشترى منهم لان الطرحه مش معجزه فعمايلها هى قماشه ومتسرفله .. وهتلاقي عناوينهم
على جوجل لكن قبل اى حاجه اعرف الاول اسعار الموسكى علشان ماحد يضحك عليك.
وختاما .. انا كتبت لكم
الاماكن المشهوره على مستوى الجمهوريه اللي اعرفها وجربتها .. المهم انك قبل اى مشروع
ملكش فيه اى خبره ..
اولا تنزل تعمل جوله كبيره
جدا ممكم اكتر من يوم او يومين او اكتر لغايه ماتلم كل المعلومات وتعرف التجار اللي
وشهم سمح واسعارهم كويسه ..
ثانيا تنزل تشوف المنتجات
دى بتتباع بكام قطاعى فالمحلات .. يبقي انت عرفت فعلا سعر الجمله وسعر البيع .. يبقي
كده تقدر تبيع بأقل او مثل سعر السوق القطاعى .. علشان تبنى سمعه كويسه ودى اهم اهم
اهم حاجه فالتجاره.
وعايزك تعرف ان نجاحك فالتجاره
مرتبط بسعيك وصفاء نيتك واعلم يقينآ ان ربك هو اللي بيوفقك مش بنصاحتك ولا بذكاءك
.. فحاول بكل قوتك انك متزعلوش منك .. كل اللى انت نفسك توصله بأيده لوحده سبحانه
.. فمتفكرش انك هتوصل ابدا لو زعلته منك .. وأكتر حاجه بتزعل ربك هو الاضرار بالناس
.. فخلى بالك من النقطه دى جداااااااا
وعلى فكره انت ممكن ربنا
ينجحك وانت مزعله لكن هيحرمك من الاستمتاع بالنجاح دا .. يعنى هتكون ناجح ادام نفسك
وادام الناس لكن عايش فنكد ما بعده نكد ..
يعنى متتغرش لما تلاقي
واحد ماشي غلط وشغله ناجح .. لازم تتأكد انه عايش فنكد وبيته مولع بالمشاكل وبيبقي
نفسه يشترى لحظه سعاده بجد بأي تمن .. وبيحاول لكن طبعا بيفشل لان اللي بأيده انه يسعده
زعلان منه ..
الكلام دا بعد ما شفت بنفسي
كل دا على الطبيعه خلال خمسين سنه .. وللاسف عمرى ما لقيت ربنا مستثنى حد من كده ..
الخلاصه .. توكل على الله .. واسعى .. وصفي
نيتك .. وانوى انك تعمل شغل يبسط الناس اولا ويبسطك ثانيا .. واعرف ان رزقك مكتوب لا
هيزيد ولا هيقل لكن اللى بنعمله دا علشان ربنا يبارك لنا فيه ويسعدنا بيه .. ارضي ربنا
هتلاقي الخير جايلك من كل مكان .. والله العظيم ربنا بيحبنا أوى ..
الخلاصه .. توكل على الله ..
واسعى .. وصفي نيتك .. وانوى انك تعمل شغل يبسط الناس اولا ويبسطك ثانيا .. واعرف
ان رزقك مكتوب لا هيزيد ولا هيقل لكن اللى بنعمله دا علشان ربنا يبارك لنا فيه
ويسعدنا بيه .. ارضي ربنا هتلاقي الخير جايلك من كل مكان .. والله العظيم ربنا
بيحبنا أوى ..
توكل على
الله وانزل ولو حتى علشان تاخد فكره وتعرف الدنيا ماشيه ازاى انزل وهتلاقي ابواب
خير اتفتحت لك .. انزل علسان القعده من غير شغل صعبه اوى وبتقتل حاجات كتير جواك
.. انزل علشان تبدأ زى ما ناس كتيييير اوى بدأت ودلوقتى من اغنى الاغنياء.. انزل
وربنا هيجبر بخاطرك ومش هيكسفك ابدا ما دام نيتك تكسب بالحلال – منقول مع
بعض التعديلات والتصريف .
ولا تترددوا في
ترك استفساراتكم
متنساش لايك
للبوست وكمان شير حتي تعم الفائدة للجميع
زكاة العلم إخراجه
زكاة العلم إخراجه
حكمتي المفضله : تعلم العلم فإنك لا تدري متي تحتاج إليه